A nosa principal ferramenta de traballo é un profundo coñecemento do pequeno ecosistema no que producimos.
Entendemos a agricultura como unha colaboración activa e simbiótica coa natureza. O noso método baséase nos principios da agroecoloxía.
Combinamos tradición, técnica e coñecemento para producir alimentos de calidade, de forma sostible, rexenerativa e eficiente, coidando a vida e a fertilidade da nosa horta.
Unha grande parte do noso esforzo dedícase a coidar e enriquecer a microbioloxía da nosa terra.
Traballamos con materia orgánica de calidade que actúa como un probiótico para o chan, alimentando a vasta comunidade de fungos, bacterias e microorganismos que habitan a nosa horta.
Practicamos o mínimo labor para non alterar a estrutura do chan e protexer as redes de micorrizas, que fan posible unha nutrición saudable para todo o que cultivamos.
Ademais, o uso de acolchados orgánicos mantén a humidade, protexe da erosión e achega materia orgánica de forma continua ao chan, creando un ecosistema fértil e resiliente que é a verdadeira base da nosa produción.
O noso calendario de sementeiras e colleitas está intimamente ligado ao clima atlántico.
Unha adaptación consciente ás nosas estacións permítenos producir coidando que, no momento de collermos, a verdura e hortaliza alcanzase o seu punto óptimo de sabor e propiedades nutritivas.
Cultivar en Galicia significa entender que a humidade pode ser unha aliada, e que o sol moderado concentra sabores únicos nas nosas hortalizas de folla, raíces e tubérculos.
No canto de loitar contra o clima, aprendemos a escoitalo, seleccionando as variedades que mellor medran na nosa horta. O resultado é un produto cun carácter inconfundiblemente galego, cheo da esencia da nosa terra.
O noso compromiso cunha produción respectuosa co medio ambiente e coa saúde das persoas é totalmente transparente.
A nosa produción está adscrita ao Consello Regulador da Agricultura Ecolóxica de Galicia (CRAEGA). A certificación ecolóxica é a validación externa dunha filosofía que practicamos día a día por convicción propia.
Certifica que todo o noso proceso, desde a semente ata a colleita, está libre de pesticidas, herbicidas e abonos químicos. É un mecanismo xusto e transparente que garante que os alimentos que levas á túa mesa están cultivados dunha forma sa, natural e que, ademais, rexenera o ecosistema e protexe a biodiversidade da nosa contorna.